Sérstakur skattur á minni fyrirtæki
- www.opus.is :
- Forsíða ->
- Lagapunktar - Fréttabréf ->
- Tölublað 2, 2012 ->
- Sérstakur skattur á minni fyrirtæki
Túlkun á svokallaðri 50/20% reglu þegar kemur að
skattlagningu arðs í litlum fyrirtækjum hefur verið mjög óljós og
álitaefnin sem upp hafa komið fjölmörg. Það sem er
ósanngjarnt við þessa sérstöku skattlagningu á arði er að hún
bitnar einna helst á einyrkjum og minni fjölskyldufyrirtækjum. Enda
á reglan ekki við um hluthafa sem fá arðgreiðslur frá fyrirtæki sem
þeir starfa ekki hjá, né starfandi hluthafa sem eiga minni hlut en
20% í félaginu. Reglunni er því beint gegn smærri fyrirtækjum með
færri hluthöfum. Stærri fyrirtæki og hluthafar þeirra, sem eru þó
jafnvel í beinni samkeppni við hin smærri, eru hins vegar laus við
þessar kvaðir. Til að skýra betur þennan mismun og ójafnræði í
skattalagningunni skal tiltaka tvö dæmi.
Í fyrra dæminu er um að ræða nýsköpunarfyrirtæki í eigu
fjögurra einstaklinga í jöfnum hlutföllum sem rekið er í formi
einkahlutafélags. Hluthafar starfa allir hjá félaginu. Ofangreind
regla á við um þrjá af fjórum og til glöggvunar er skattlagning í
grófum dráttum á þann hátt að félagið greiðir 20% tekjuskatt af
hagnaði en leyfist ekki að nota arðgreiðslu sem frádrátt á móti
tekum þó að hluti arðsins sé í raun skattlagður eins og laun fremur
fjármagnstekjur. Allir starfandi hluthafar hafa áður greitt
tekjuskatt, 37-46%, af reiknuðum launum skv. viðmiðunarreglum
ríkisskattstjóra, þ.e.a.s. "markaðslaunum". Hagnaði er úthlutað sem
arði og helmingur er skattlagður eins og venjulegar
fjármagnstekjur, 20%, en hinn helmingurinn er skattlagður með
u.þ.b. 40% tekjuskatti, miðskattþrepi.
Í þessu dæmi er heildarskattlagning hverrar 100 krónu
úthlutaðs hagnaðar því 24 krónur af þeim 80 krónum sem eftir eru
eftir tekjuskatt. Eftir standa því 56 krónur af 100 krónunum eða
44% heildarskattlagning. Taka verður mið að því að starfandi
hluthafar hafa áður greitt tekjuskatt af launum
sínum.
Í seinna dæminu er um að ræða nýsköpunarfyrirtæki í eigu sjö
einstaklinga í jöfnum hlutföllum sem rekið er í formi
einkahlutafélags. Hluthafar starfa allir hjá félaginu. Í þessu dæmi
er heildarskattlagning hverrar 100 krónu úthlutaðs hagnaðar 16
krónur af þeim 80 krónum sem eftir eru eftir tekjuskatt. Eftir
standa því 64 krónur eða 36% heildarskattlagning. Aftur verður að
taka mið af því að starfandi hluthafar hafa áður greitt tekjuskatt
af launum sínum. Munurinn er því 8% og af hverjum 10.000.000 krónum
nemur sá munur 800.000 krónum.
Eins og sjá má af þessum tveimur dæmum getur munurinn á
heildarskattlagningu fyrirtækja numið verulegum
fjárhæðum.
Allar nánari upplýsinga veita Teitur Björn Einarsson hdl. og Borgar Þór Einarsson hdl. í síma 415-2200.