Notkun vátryggingafélaga á PC crash skýrslum við ákvörðun bótaréttar eftir umferðarslys
- www.opus.is :
- Forsíða ->
- Lagapunktar - Fréttabréf ->
- September 2016 ->
- Notkun vátryggingafélaga á PC crash skýrslum við ákvörðun bótaréttar eftir umferðarslys
Vátryggingafélögin hér á landi hafa í auknum mæli sl. ár stuðst
við svokallaðar PC crash skýrslur við ákvörðun bótaréttar
einstaklinga vegna líkamstjóns eftir umferðarslys. Þessum skýrslum
er ætlað að reikna út höggkraft og hraðabreytingu sem kemur á
ökutæki við árekstur. Þær eru ekki sönnunargagn um það hvort
einstaklingur sem lendir í árekstri hafi orðið fyrir líkamstjóni og
geta því heldur ekki staðfest að einstaklingur sem lendir í
umferðarslysi hafi ekki orðið fyrir
líkamstjóni.
Svo virðist sem vátryggingafélög leggi hins vegar þann skilning í
skýrslurnar og á grundvelli þeirra hafa vátryggingafélög hér á
landi ítrekað hafnað bótaskyldu vegna líkamstjóns eftir
umferðarslys. Vísa félögin þá m.a. til hraðaútreikninga sem finna
má í skýrslunni og slá því föstu að tjónþoli hafi ekki getað orðið
fyrir líkamstjóni við þessar tilteknu aðstæður.
Til þess að komast að niðurstöðu um hvort einstaklingur hafi orðið
fyrir líkamstjóni eftir umferðarslys er grundvallaratriði að skoða
læknisfræðileg gögn. Því hefur verið slegið föstu af dómstólum og
staðfesti Fjármálaeftirlitið það með skoðun sinni í janúar 2016 á
notkun PC crash skýrslna hjá vátryggingafélögum. Þá áréttaði
Fjármálaeftirlitið það við vátryggingafélögin að þau hugi að
upplýsingaskyldu sinni gagnvart aðilum um það hvernig staðið er að
útreikningi í skýrslunum en í langflestum tilfellum afla félögin
þessara skýrslna einhliða.
Sjá nánar um niðurstöðu fme
Það er því gríðarlega mikilvægt að einstaklingur sem lendir í
umferðarslysi leiti til læknis finni hann fyrir einkennum eftir
slysið, þrátt fyrir að högg hafi verið smávægilegt eða lítið
sjáanlegt tjón sé á bifreiðunum.
Ef vátryggingafélag hafnar bótaskyldu í máli á grundvelli PC crash
skýrslu er mikilvægt að tjónþoli leiti strax til lögmanns og láti
reyna á gildi skýrslunnar.
OPUS lögmenn hafa langa reynslu af hagsmunagæslu í slysamálum en
allar nánari upplýsingar í þessum efnum veitir Arna Pálsdóttir
hdl., sviðsstjóri skaðabótasviðs OPUS lögmanna í
síma 415-2200 eða í gegnum [email protected].