Meiðyrði á samfélagsmiðlum
- www.opus.is :
- Forsíða ->
- Lagapunktar - Fréttabréf ->
- September 2016 ->
- Meiðyrði á samfélagsmiðlum
Það er kunnara en frá þurfi að segja að samfélagsmiðlar
eru orðnir einn helsti vettvangur samfélagsumræðu, skoðanaskipta og
tjáningar af ýmsu tagi. Miðlar eins og Facebook, Instagram og
Twitter gera fólki enda kleift að koma efni og skoðunum á framfæri
með lítilli sem engri fyrirhöfn.
Næstum óhjákvæmilegur fylgifiskur þessa er að stundum verða
árekstrar, ekki síst ef gengið er of langt í grófum eða
hatursfullum ummælum. Þá lýstur saman tjáningarfrelsi eins og
friðhelgi einkalífs eða æruvernd annars. Telji einhver að sér vegið
með slíkum hætti geta ágreiningsmál um það endað fyrir
dómstólum.
Ýmis slík mál hafa raunar þegar ratað fyrir íslenska
dómstóla. Þar hefur t.d. verið tekist á um það hvort birting efnis
og ummæla á samfélagsmiðlum teljist opinber birting en slíkt getur
skipt máli við mat á refsingu, skaðabótaábyrgð og fjárhæð
miskabóta. Telst stöðuuppfærsla á Facebook t.d. opinber birting ef
hún er aðeins aðgengileg Facebook-vinum viðkomandi?
Ef til vill er ekki til einhlítt svar við þessu. Til
leiðbeiningar má þó sem dæmi hafa dóm Hæstaréttar Íslands í máli
nr. 214/2014 frá 20. nóvember 2014. Þar taldi Hæstiréttur að
birting myndar á Instagram teldist opinber birting og féllst ekki á
málsvörn um að sú háttsemi að setja mynd á samfélagsmiðilinn hefði
ekki falið í sér birtingu hennar í merkingu 2. mgr. 236. gr.
hegningarlaga en sá, sem myndina birti, hafði álitið að aðeins
takmarkaður fjöldi manna hefði þar aðgang að henni.
Þá var í öðrum dómi Hæstaréttar nr. 469/2011 frá 24. maí
2012 talið að birting ummæla á hinum gamalkunna samfélagsmiðli
MySpace hefði verið opinber jafnvel þó viðkomandi hafi haldið því
fram að þau hafi einungis verið ætluð fjölskyldu hennar og nánustu
vinum. Hér skipti líka máli að ummælin höfðu sannarlega breiðst út
til annarra og að viðkomandi hafði ekki búið svo um hnútana að
tryggt væri að þau gerðu það ekki.
Í öllu falli er ljóst að ærumeiðandi ummæli á
samfélagsmiðlum geta valdið bótaábyrgð þess sem þau setur fram rétt
eins og við á um hefðbundna fjölmiðla. Við úrlausn slíkra geta
fjölmörg atriði komið við sögu. Þannig skiptir máli í hvaða
samhengi er ummælin eru sett fram, hvert er eðli þeirra og
tilgangur og hvernig birtingu þeirra var háttað. Litið er til þess
hvort ummælin eigi erindi í þjóðfélagsumræðu eða hvort um sé að
ræða einkamálefni sem eiga ekki erindi til almennings og svo mætti
áfram telja.
OPUS lögmenn veita nánari lögfræðiráðgjöf á þessu
réttarsviði og búa þar að langri reynslu. Nánari upplýsingar
veitir Bjarni Þór Sigurbjörnsson
hdl. í síma 415-2200 eða í gegnum [email protected].